प्रफुल आता आपल्यामध्ये नाही, हे वास्तव स्वीकारणे कठीण आहे. 24 जून 2015 रोजी अॅामस्टरडॅम, नेदरलँड येथे वयाच्या पासष्टाव्या वर्षी त्याने या जगाचा निरोप घेतला. आजघडीला जागतिक राजवटीबरोबरच विविध राष्ट्र-राज्यांनी अंगीकारलेल्या कॉर्पोरेटनियंत्रित विकासाच्या प्रारूपाबाबत प्रफुलने नेहमीच टीकात्मक व आलोचनात्मक भूमिका मांडली. या कॉर्पोरेटकेंद्रित विकासाच्या प्रारूपामुळे समाजातील गरीब जनतेपुढे विस्थापन व कोणत्याही प्रकारच्या भौतिक सामाजिक सुविधांचा अभाव असलेल्या प्रदेशामध्ये पुनर्वसन हे दोनच पर्याय शिल्लक राहतात. प्रफुलच्या मते बहुराष्ट्रीय कंपन्या व आंतरराष्ट्रीय संघटना आज वाढती बेरोजगारी, पर्यावरणाचा वाढता र्हास व कामगार प्रक्रिया व कामगार यांचे मूल्य कमी करण्याच्या प्रक्रियेला अनुकूल अशा धोरणनिर्मितीस हातभार लावत आहेत.